![صلاة العيد! حكمها وركعاتها ووقتها 1 صلاة العيد! حكمها وركعاتها ووقتها](/wp-content/uploads/2023/04/1682026936858.jpg)
صلاة العيد! حكمها وركعاتها ووقتها-يا دكتور هي صلاة العيد لها وقت معين؟
- طبعا.. من بعد الشروق بربع ساعة تقريبا (ارتفاع الشمس قيد رمح).. إلى وقت الظهر (وقت الزوال)
فمن صلى في أي ساعة بين هذين الوقتين فقد أدرك صلاة العيد.
–أفهم من كده يا دكتور إنى لو قمت من النوم متأخر والظهر لم يؤذن يجوز لي أن أصليها عادى ؟!
- أه تمام صح كده
–طب يا شيخ لازم نصليها يعني.. أصل ساعات الواحد بيكسل ؟
- العلماء مختلفين في درجة مشروعيتها (فرض عين.. يعني لازم كل مسلم يصليها… أم فرض كفاية (إذا فعلها البعض سقط الإثم عن الباقين).. أو سنة مؤكده.. (لم يتركها النبي ولا الصحابة من بعده)
فهل عبادة بالشكل ده ينفع تقول بكسل عن أدائها؟!!!
ما يصحش كده يا عم امال
–طب نصليها فين يا دكتور ما حضرتك عارف إن الساحات مقفولة ؟🤔
- مهي الوزارة قالت إن صلاة العيد السنادي في المساجد.
–طب يا دكتور كيف تكون صلاة العيد؟
- تُصلى ركعتين وتكبر في الأولي سبع تكبيرات (من غير تكببرة الاحرام) ثم تقرأ الفاتحة وسورة الأعلى أو سورة ق، زي ما تحب في ايهما.
- وفي الركعة الثانية تكبر خمس تكبيرات (من غير تكبيرة الانتقال) ثم تقرأ سورة الغاشية أو القمر.. ثم تجلس لتسمع الخطبة أو تقول أنت الخطبة إذا كنت أنت الامام!
–خطبة صلاة العيد ؟!😮
- مش لازم هى سنة
بس ليه تسيب سنة وأنت تقدر تعملها خاصة إن الموضوع بسيط هتنزل خطبة عيد مكتوبة من على النت وتقراها في خمس دقائق وشكرا على كده.
–طب خطبة واحدة أم خطبتين بينهما جلسة استراحة خفيفة 🤔
- المسألة محل خلاف بين أهل العلم والأمر في هذا واسع ، وليس في السنة النبوية نص فاصل في المسألة ، وإن كان ظاهرها أنها خطبة واحدة ، فيفعل الإمام ما يراه أقرب إلى السنة في نظره، أو زي ما عود الناس عندهم في بلدهم، لكن الجمهور من أهل العلم على انها خطبتين قياسا على خطبة الجمعة.
- وإن كنت لا تعلم فقه المسألة وهتنزل خطبة من على النت فالتزم بها سواء خطبة واحدة أو خطبتين.
–بس انا يا دكتور ممكن اتغلبط في التكبيرات أو مش حافط السور اللي انت قلت عليها…😖
- عادي جدا التكبيرات والسور من السنن فلو معرفتهاش صل ركعتين عادتيتين خالص زى أى ركعتين من غير تكبيرات زيادة وبأى سور أنت حفظها (أنت حبيبي ومش هعملك زى الزبون) 😂 😍
–طب يا دكتور لو أنا مأموم نرفع ايدينا مع الإمام ونرفع صوتنا مع التكبير ؟😳
- رفع اليد الأمر فيه واسع، فاعمل ما شئت لكن لا ترفع صوتك أثناء التكبير.
–طب معلش يا شيخ لو فاتني بعض التكبيرات في الركعة الأولي أو فاتتني الركعة الأولى كلها أعمل ايه؟🤔
- لوفاتتك بعض التكبيرات فلا شيء عليك، يعنى هتكبر معاهم ولا تعيد ما فاتك من تكبيرات.
- ولو فاتتك الركعة الأولى هتصلي معاهم عادي ولما الإمام يسلم هتقوم تجيب ركعة ولكن هتكبر خمس تكبيرات مش سبعة؛ لانها في حقك الثانية.
–طب لو انا راحت عليا نومة ومصحتش إلا بعد الظهر ينفع اصلى العيد قضاءا 🤔
- الأمر على خلاف والراجح أن ذلك يستحب
–طب بنفس التفصيل اللى حضرتك قلت عليه ؟!🤔
- أه طبعا بس من غير خطبة، صلاة فقط.
وكل عام وانتم بألف صحة و سعادة وبركة وعافية يارب العالمين.
والله أعلى وأعلم
والحمد لله رب العالمين وعلى الله قصد السبيل
أد.أحمد خالد الجارحي
أستاذ الدعوة والثقافة الإسلامية المتفرغ بجامعة الأزهر الشريف